10 نصائح لاستخدام أفضل لخدمة Google Calendar

الكثير حتى الحين ما يستخدم خدمات تنظيم زي Google Calendar أو غيرها. عشان كذا حبّيت أتكلم عنها بشكل مختصر في هالتدوينة.

 أول شي الخدمة مجانية، تقدر تستخدمها في أكثر من مكان، جوال أو موقع الويب، أو تابلت…الخ، واستخدامك لها يعتمد على طريقة عملك بالحياة. راح أحط لكم عدة استخدامات ممكن تفيدكم وتخليكم تعتمدون أكثر على الخدمة:

1- نخليها تعمل على أنها To-Do أو وسيلة لتنظيم الحياة، تذكرك بالواجبات أو الأشياء المطلوبة

2- تذكير بمواعيد انتهاء البطاقات، الأحوال والجواز والرخصة والصرّاف والتأمين…الخ

3- تذكير بإنتهاء الإشتراك في المواقع أو الخدمات، أو انتهاء اشتراك في خدمة بث تلفزيوني

4- تذكير بأعياد ميلاد أصدقائك، مع خاصية التكرار كل سنة بنفس اليوم

5- تذكير بمواعيد المستشفيات، خاصة اللي تأخذ وقت طويل وصعبة تتذكرها

6- تذكير بمواعيد مسلسلاتك المفضلة، مع خاصية التكرار كل اسبوع

7- لو كنت طالب، راح تسهّل عليك وضع جدول الاختبارات والمواعيد النهائية للواجبات والمشاريع

8- إضافة مواعيد رحلاتك ذهاباً وإياباً، تقدر بعدها تعرف آخر مرة متى سافرت ولمدة كم

9- إضافة تعديلاتك للسيارة. مثلاً غيّرت زيت أو كفرات، عشان تعرف هل تحتاج تغيّر هالشي بعدين ولاّ لا

10- إضافة تاريخ شراءك للأشياء، مثلاً مكيف أو ثلاجة. عشان تعرف كم صار عليها وهل تحتاج صيانة أو لا

إضافات أخرى:

ممكن التنبيهات هذي كلها تتحدد بموعد انت تختاره، يعني مب لازم نفس اليوم. مثلاً تذكير انتهاء بطاقة الأحوال تقدر تخليه ينبهك عليه قبل شهر أو شهرين…الخ

طبعاً كل هالمزايا ممكن تستعين فيها ببرامج ثانية صحيح، بس أحلى شي في هذي الخدمة انها تجمع لك كل شي بمكان واحد، وتقدر تستغني عن أكثر من برنامج وتستخدم هذا بس

 فيه للخدمة عدة تطبيقات على Android و iOS طبعاً. حالياً أنا أستخدم تطبيق Business Calendar على Android ومرتاح معاه كثير. وتطبيق Today Calendar ممتاز وواجهته رهيبة بعد

 أيش رايكم في الخدمة؟ وهل عندكم نصائح أكثر عن طرق لتنظيم المواعيد؟